豬肉佬

我今日响油麻地街市同個豬肉佬講﹕「廿蚊排骨，我要舊靚啲喎。」

求其up句，點知舊排骨真係幾靚喎。肥瘦適中，用鎮江汁炆咗半個鐘，啲肉鬆軟又入味，食到個嘴油淋淋。Yeah!

講番買餸，買完豬肉走去買菜，見到一棵長長地但表面好滑的瓜，問賣菜阿姐，佢話﹕「係水瓜，長呢隻唔多水架，短個隻好多水。」哦，咁即係點煮？用蒜泥炒就得啦。

番來求其加啲洋蔥同台灣買的大蝦米， 超好味呀﹗

再Yeah!

之後又同賣雜貨個阿姐傾偈，因為佢教我煲靚湯，所以我都幫咗佢買幾十蚊野。佢話，啲無花果乾要打橫切，唔可以打直切，唔係啲湯會酸。咁都得？原來呢個秘方，都係佢啲熟客老太太教的﹕「阿婆煲咗咁多年湯，信佢無死啦。」

我愛街市﹗